luuTā jaane vāloñ ne
yaad na aane vāloñ ne
kis pastī meñ ghasīT liyā
haath baḌhāne vāloñ ne
kar hī diyā dīvār ko dar
sar Takrāne vāloñ ne
sach bhī mujhe kahne na diyā
zahr pilāne vāloñ ne
kyā kyā DhūñDh nikālā hai
ḳhud kho jaane vāloñ ne
mujh ko chhīn liyā mujh se
aane jaane vāloñ ne
piiTh meñ ḳhanjar ghoñp diyā
gale lagāne vāloñ ne
dil ko sulagtā chhoḌ diyā
aag bujhāne vāloñ ne
kyā mafhūm nikālā hai
matlab paane vāloñ ne
jism kā ik ik bhed diyā
naam chhupāne vāloñ ne
ghar na kiyā dil meñ 'rāshid'
zehn meñ chhāne vāloñ ne