jo qarz mujh pe hai vo bojh utārtā jā.ūñ
koī sune na sune maiñ pukārtā jā.ūñ
miTā chukā huuñ jise apne safha-e-dil se
ġhazal ġhazal vahī chehrā ubhārtā jā.ūñ
na jaane mere ta.āqub meñ kaun kaun aa.e
maiñ apne naqsh-e-kaf-e-pā ubhārtā jā.ūñ
jo mere paas hai apne liye bachā rakkhūñ
jo mere paas nahīñ tujh pe vārtā jā.ūñ
qadam qadam pe na.e log sāmne aa.eñ
qadam qadam pe na.e ruup dhārtā jā.ūñ
kahīñ bane na anā merī raah meñ dīvār
ye tauq apne gale se utārtā jā.ūñ
muqābla to karūñ 'rāshid' apne dushman se
ye aur baat hai jītūñ ki hārtā jā.ūñ