na.e nairañg dikhlātā hai ye charḳh-e-kuhan kyā kyā

jahāñ meñ gul khilā.egī abhī ḳhāk-e-chaman kyā kyā

jahāñ kī sar-bulandī kā ma.āl-e-kār pastī hai

nashāt-o-aish-e-mun.im par hai muflis ḳhanda-zan kyā kyā

usī husn-e-azal kī lauh-e-ālam par haiñ tahrīreñ

vahī ik ishq kā mazmūñ hai andāz-e-suḳhan kyā kyā

abhī se rah-navard-e-ishq himmat haar baiThe haiñ

guzarnī haiñ abhī to ghāTiyāñ un ko kaThan kyā kyā