anokhā kuchh kahāñ aisā huā hai
tamāshā sab mirā dekhā huā hai
ḳhushī ko ham-nashīñ apnā banā kar
nishān-e-ġham bahut gahrā huā hai
hañsī kyuuñ be-tahāsha aa.ī us ko
zamāna kis liye sankā huā hai
na.ī shādāb qurbat kī fazā meñ
bahut maḳhmūr sā lahja huā hai
sarāpā dekh kar dilkash kisī kā
har ik manzar vahāñ Thahrā huā hai
kabhī mansūb rāhat se thā dariyā
baḌā be-dard vo sahrā huā hai
tapish meñ ishq kī bechain sā thā
kaleja ro ke ab ThanDā huā hai
sajā kar bazm 'ja.afar' aarzū kī
akelā der se baiThā huā hai