zard pattā jo Daal se niklā
hasratoñ ke vabāl se niklā
apnā vahm-o-gumāñ qavī kar ke
vaqt-e-āḳhir zavāl se niklā
zindagī kā tavīl hañgāma
laal sūraj ke thaal se niklā
log chup the magar vo afsāna
vaqt ke qīl-o-qāl se niklā
mahv-e-hairat hai aaj tak manzil
rāsta kaisī chaal se niklā
vo zamāñ aur makāñ se aage thā
mutma.in har ḳhayāl se niklā
kaise tai ho bachā huā rasta
sher baiThā hai jaal se niklā
lo baġhal meñ sameT kar rakh lo
haath ThanDā hai shaal se niklā
kaisā mub.ham javāb ai 'ja.afar'
mere vāzeh savāl se niklā