gumāñ to Thiik maiñ kaise kahūñ yaqīn bhī hai
ki mere paañv ke nīche kahīñ zamīn bhī hai
diloñ meñ duniyā basā.e hue to phirte ho
ḳhayāl rakhnā ki duniyā ke saath diin bhī hai
hamāre jaib-o-garebāñ meñ saañp kyā miltā
use ḳhabar hī nahīñ thī ki āstīn bhī hai
taras jo khā ke kisī jānvar pe shaah bane
hujūm-e-shāh meñ koī sabuktagīn bhī hai
suḳhan-shanās nahīñ zūd-go bhī hai 'jāved'
paḌhā-likhā hī nahīñ aadmī zahīn bhī hai