aa.heñ aflāk meñ mil jaatī haiñ
mehnateñ ḳhaak meñ mil jaatī haiñ
sūrateñ ābla-hā-e-dil kī
ḳhosha-e-tāk meñ mil jaatī haiñ
said-e-bismil kī nigāheñ sayyād
tere fitrāk meñ mil jaatī haiñ
nigaheñ yaar kī juuñ tār-e-rafū
jigar-e-chāk meñ mil jaatī haiñ
pople zāhidoñ kī khāte vaqt
ThoḌiyāñ naak meñ mil jaatī haiñ
thalkiyāñ dil kī 'baqā' dekhūñgī
zaḳhm-e-kāvāk meñ mil jaatī haiñ