Darā rahī thī mujhe aur Dar liyā maiñ ne
phir ek roz mohabbat kā sar liyā maiñ ne
kisī se māñgī musalsal rasad aziyyat kī
phir apne saa.e ko dīvār kar liyā maiñ ne
pahan rahe the kisī ġham kā pairahan kuchh log
agarche mahñgā paḌā mujh ko par liyā maiñ ne
baġhair udāsī munāsib nahīñ thā ghar jaanā
ye intizām use chhū ke kar liyā maiñ ne
tamām ho ga.ī mujh par kisī kī hujjat dost
jahāñ nahīñ thā bipharnā biphar liyā maiñ ne