maiñ huuñ merī chashm-e-tar hai raat hai tanhā.ī hai

dard merā ham-safar hai raat hai tanhā.ī hai

jugnuoñ se saath chalne kī guzārish kījiye

hijr kā lambā safar hai raat hai tanhā.ī hai

phir vahī yādeñ vahī aañsū vahī āh-o-fuġhāñ

phir vahī dīvār-o-dar hai raat hai tanhā.ī hai

dostoñ kī bhiiḌ ko masrūfiyat meñ kho diyā

aaj fursat baam par hai raat hai tanhā.ī hai

tujh ko paane ke junūñ meñ ham vahāñ tak aa ga.e

ḳhud ko ab khone kā Dar hai raat hai tanhā.ī hai