us ne apnā liyā to Thahrā maiñ
vo samundar hai aur dariyā maiñ
us kī vus.at meñ vus.ateñ merī
us kī gahrā.iyoñ meñ gahrā maiñ
sañg barse ki phuul mat pūchho
TūTnā thā mujhe so TuuTā maiñ
ham-nashīñ kyā jo ham-ḳhayāl nahīñ
anjuman anjuman huuñ tanhā maiñ
rabt-e-guft-o-shunīd ho to khule
log gūñge haiñ yā huuñ bahrā maiñ
ab na jazba na aarzū na umiid
bin divānoñ kā ek sahrā maiñ
yaad rakhnā hī nā-guzīr hai kyuuñ
kabhī tujh ko bhulā bhī saktā maiñ