havāoñ ke muqābil huuñ
charāġhoñ kī vo mahfil huuñ
ḳhudā jaane kahāñ huuñ maiñ
na bāhar huuñ na shāmil huuñ
mire kāñdhe pe vo bikhre
haiñ mauj ik vo maiñ sāhil huuñ
ye chādar silvaTeñ takiya
batāte haiñ maiñ ġhāfil huuñ
maiñ jo chāhūñ vo pā luuñ par
abhī ḳhud hī se ġhāfil huuñ
yahāñ sach be-sahārā hai
sahārā duuñ maiñ bātil huuñ
umīdeñ tum se rakhtī huuñ
kaho to kitnī jāhil huuñ
juā hai zindagī jaise
jo jiite us ko hāsil huuñ
rahe zad meñ junūñ jis ke
usī ko phir maiñ hāsil huuñ