nākām hasratoñ ke sivā kuchh nahīñ rahā
duniyā meñ ab dukhoñ ke sivā kuchh nahīñ rahā
ik umr ho ga.ī hai ki dil kī kitāb meñ
kuchh ḳhushk pattiyoñ ke sivā kuchh nahīñ rahā
yādeñ kuchh is tarah se samā.at pe chhā ga.iiñ
pichhlī rafāqatoñ ke sivā kuchh nahīñ rahā
lab sī liye to apne hī kamre meñ yuuñ lagā
ḳhāmosh ā.inoñ ke sivā kuchh nahīñ rahā
jazbe tamām kho ga.e lamhoñ kī dhuul meñ
ab dil meñ dhaḌkanoñ ke sivā kuchh nahīñ rahā