jiinā mushkil hai ki āsān zarā dekh to lo

log lagte haiñ pareshān zarā dekh to lo

phir muqarrir koī sargarm sar-e-mimbar hai

kis ke hai qatl kā sāmān zarā dekh to lo

ye nayā shahar to hai ḳhuub basāyā tum ne

kyuuñ purānā huā vīrān zarā dekh to lo

in charāġhoñ ke tale aise añdhere kyuuñ hai

tum bhī rah jāoge hairān zarā dekh to lo

tum ye kahte ho ki maiñ ġhair huuñ phir bhī shāyad

nikal aa.e koī pahchān zarā dekh to lo

ye satā.ish kī tamannā ye sile kī parvāh

kahāñ laa.e haiñ ye armān zarā dekh to lo