chup guzar jaatā huuñ hairān bhī ho jaatā huuñ
aur kisī din to pareshān bhī ho jaatā huuñ
sīdhā rasta huuñ magar mujh se guzarnā mushkil
gumrahoñ ke liye āsān bhī ho jaatā huuñ
fā.eda mujh ko sharāfat kā bhī mil jaatā hai
par kabhī bā.is-e-nuqsān bhī ho jaatā huuñ
apne hī zikr ko suntā huuñ harīfoñ kī tarah
apne hī naam se anjān bhī ho jaatā huuñ
raunaqeñ shahr basā letī haiñ mujh meñ apnā
aan kī aan meñ sunsān bhī ho jaatā huuñ
zindagī hai to badal letī hai karvaT 'shahpar'
aadmī huuñ kabhī haivān bhī ho jaatā huuñ