ziddī aḌiyal hai ḳhurāfāt pe ruk jaatī hai
soch us shaḳhs ke hālāt pe ruk jaatī hai
ishq mohlat hī nahīñ detā jahāñ-dāri kā
har tamannā to usī zaat pe ruk jaatī hai
ashk tham jaate haiñ badle hue mausam ke sabab
aur bārish kabhī jazbāt pe ruk jaatī hai
bhaa.ī kuchh zabt sikhā dūsre ghar jā.egī
terī beTī to savālāt pe ruk jaatī hai
zindagī ko kabhī de detī huuñ chaukhaT pe jagah
ye bhikāran isī ḳhairāt pe ruk jaatī hai
mere ash.ār kā me.aar hī kam hai shāyad
is liye daad bhī hazrāt pe ruk jaatī