pūchh mat kal ā.īne meñ kyā huā
apne zinda hone kā dhoka huā
roz sūraj Dūbtā ugtā huā
vaqt kī ik kiil par laTkā huā
aa gayā le kar udhārī raushnī
chāñd ne sūraj ko hai pahnā huā
tishnagī apnī bujhā.eñ kaise ham
jo samundar thā vo ab sahrā huā
shahr se jab bhī ye dil uktā gayā
dasht kī jānib mirā jaanā huā
ḳhūbiyāñ merī koī gintā nahīñ
ik zarā sī bhuul kā charchā huā
aa ga.ī huuñ duur chalte chalte maiñ
āsmāñ par hai vahīñ Thahrā huā
yaad us kī dil se kyuuñ jaatī nahīñ
vo to 'sīmā' kal thā ik guzrā huā