suḳhan kiyā jo ḳhamoshī se shā.erī jaagī

charāġh lafzoñ ke jal uTThe raushnī jaagī

zid-e-malāl-o-masarrat meñ umr biit ga.ī

ye dev soyā na vo ḳhvāb kī parī jaagī

tū barf dard samundar meñ iztirāb aayā

to ḳhushk-chashm jazīre meñ kuchh namī jaagī

vahāñ zabāñ pe samundar kī ḳhushkiyāñ ubhrīñ

yahāñ zamīn ke hoñToñ pe kuchh hañsī jaagī

nazar nazar meñ samā.īñ halāvateñ 'shahpar'

ḳhayāl-e-lams-o-nazārā meñ sarḳhushī jaagī