kis pe qurbān kise yaad hue the ham bhī
yaad itnā hai ki barbād hue the ham bhī
un dinoñ bhī the kahāñ ma.anī-o-alfāz baham
lab-e-ḳhāmosh se irshād hue the ham bhī
ab to dīvār pe likkhe haiñ ka.ī naam na.e
is hasīñ shahr kī rūdād hue the ham bhī
thā vahāñ peḌ na paanī na parinda koī
kis jale dasht meñ ābād hue the ham bhī
ham nahīñ aise ki ab jashn manā.eñ jhūTe
avval avval to bahut shaad hue the ham bhī
le ga.e saare par-o-bāl uḌā kar kargas
yaad aatā hai ki āzād hue the ham bhī