ḳhāmosh the tum aur boltā thā bas ek sitāra āñkhoñ meñ
maiñ kaise na ruktā chalne lagā jab surḳh ishāra āñkhoñ meñ
manzar meñ kināroñ se bāhar dariyā-e-mohabbat bahtā hai
aur pas-manzar meñ niile se āñchal kā kinārā āñkhoñ meñ
har saal bahār se pahle maiñ paanī par phuul banātā huuñ
phir chāroñ mausam likh jaate haiñ naam tumhārā āñkhoñ meñ
ab kahne vaale kahte haiñ is shahr meñ raat nahīñ hotī
ik aisā hī din thā vo chehra jab maiñ ne utārā āñkhoñ meñ
sochā hai tumhārī āñkhoñ se ab maiñ un ko milvā hī duuñ
kuchh ḳhvāb jo DhūñDte phirte haiñ jiine kā sahārā āñkhoñ meñ