sote haiñ vo ā.īna le kar ḳhvāboñ meñ baal banāte haiñ
saada se parinde kī ḳhātir kyā reshmī jaal banāte haiñ
ummīd kī sūkhtī shāḳhoñ se saare patte jhaḌ jā.eñge
is ḳhauf se apnī tasvīreñ ham sāl-ba-sāl banāte haiñ
zaḳhmoñ ko chhupāne kī ḳhātir kapḌe hī badalnā chhoḌ diyā
pūchho to sahī ham kis ke liye apnā ye haal banāte haiñ
vo boltī āñkheñ milte hī jhuk jaatī haiñ ḳhāmoshī se
ham un ke javāb se phir apnā ik aur savāl banāte haiñ