charāġh sabr ke jis ne jalā.e royā hai
havā se rabt-o-ta.alluq baḌhā.e royā hai
sulagte ḳhvāboñ kī ta.abīr kī banāvaT meñ
jo apnī āñkheñ musalsal jagā.e royā hai
yahī nahīñ ki parinde lahū bahāte haiñ
udaas tanhā shajar bhī to haa.e royā hai
samajh lo paanī se nisbat use rahī hogī
jo canvas pe samundar banā.e royā hai
maiñ jāntī huuñ vo ik shaḳhs vasl kā maarā
parā.e hijr kā jo rañj uThā.e royā hai