duniyā ke haiñ na diin ke dilbar ke ho ga.e
ham dil se kalma-go kisī kāfir ke ho ga.e
uTThe na baiTh kar kabhī kū-e-habīb se
us dar pe kyā ga.e ki usī dar ke ho ga.e
ai chashm-e-yār maan ga.e tere sehr ko
dil de ke mo'taqid tire mantar ke ho ga.e
ham arz-e-hāl kar na sake uf-re ro.ab-e-husn
jaate hī un ke sāmne patthar ke ho ga.e
ai 'ḳhār' dil jigar pe hī qaabū nahīñ rahā
ham se ḳhilāf ġhair to kyā ghar ke ho ga.e