ḳharāb-o-ḳhasta sahī sā.ebāñ banāyā hai
muzāf-e-shahr meñ ham ne makāñ banāyā hai
kabhī rahā hī nahīñ mausamoñ se paivasta
na.e mizāj kā ik gulistāñ banāyā hai
kisī ke vāste firdaus hai ye sayyāra
hamāre vāste āzār-e-jāñ banāyā hai
hudūd-e-vaqt meñ mahdūd kar ke insāñ ko
ḳhud apne vāste kyuuñ lā-makāñ banāyā hai
gar iḳhtilāf thā 'manzar' to bhī bayāñ karte
zarā sī baat ko kyuuñ dāstāñ banāyā hai