Wali Mohammad Wali

jab sanam kun KHayal-e-bagh hua

Wali Mohammad Wali

Aurangabad, Aurangabad, Maharashtra, India

1667-1725

jab sanam kuuñ ḳhayāl-e-bāġh huā

tālib-e-nashsha-e-farāġh huā

fauj-e-ushshāq dekh har jānib

nāznīñ sāhib-e-dimāġh huā

rashk suuñ tujh labāñ surḳhī par

jigar-e-lāla dāġh-dāġh huā

dil-e-ushshāq kyuuñ na ho raushan

jab ḳhayāl-e-sanam charāġh huā

ai 'valī' gul-badan kuuñ baaġh meñ dekh

dil-e-sad-chāk bāġh-bāġh huā

Top Urdushayar.com