jalte hue jañgal se guzarnā thā hameñ bhī

phir barf ke sahrā meñ Thaharnā thā hameñ bhī

me.ār-navāzī meñ kahāñ us ko sukūñ thā

us shoḳh kī nazroñ se utarnā thā hameñ bhī

jaañ baḳhsh thā pal bhar ke liye lams kisī kā

phir karb ke dariyā meñ utarnā thā hameñ bhī

yāroñ kī nazar hī meñ na the pañkh hamāre

ḳhud apnī uḌānoñ ko katarnā thā hameñ bhī

vo shahad meñ Duubā huā lahja vo taḳhātub

iḳhlās ke vo rañg ki Darnā thā hameñ bhī

yaad aa.e jo qadroñ ke mahakte hue gulban

chāñdī ke hisāroñ se ubharnā thā hameñ bhī

sone ke hanDole meñ vo ḳhush-posh magan thā

mausam bhī suhānā thā sañvarnā thā hameñ bhī

har phuul pe us shaḳhs ko patthar the chalāne

ashkoñ se har ik barg ko bharnā thā hameñ bhī

us ko thā bahut naaz ḳhadd-o-ḳhāl pe 'amabar'

ik roz tah-e-ḳhāk bikharnā thā hameñ bhī