sahar kī dhuup sā nikhrā jamāl thā koī
vo chāñd-rāt meñ dilkash ḳhayāl thā koī
bhulā de arsh kī jannat kā ḳhvāb āñkhoñ ko
bahār-e-husn se yuuñ mālā-māl thā koī
sahar ke nuur se be-nūr chāñd kā chehra
bichhaḌ ke raat se behad niDhāl thā koī
milegā kab mujhe be-rañg ratjagoñ kā javāb
ḳhamosh raat se lipTā savāl thā koī
ḳhushī thī chehre pe lekin koī na jaan sakā
ḳhushī ke pīchhe bahut pur-malāl thā koī