shaam ke vaqt charāġhoñ sī jalā.ī huī maiñ
ghup añdheroñ kī muñDeroñ pe sajā.ī huī maiñ
dekhne vāloñ kī nazroñ ko lagūñ saada varaq
terī tahrīr meñ huuñ aise chhupā.ī huī maiñ
ḳhaak kar ke mujhe sahrā meñ uḌāne vaale
dekh raqsāñ huuñ sar-e-dasht uḌaa.ī huī maiñ
kyā añdheroñ kī hifāzat ke liye rakkhī huuñ
apnī dahlīz pe ḳhud aap jalā.ī huī maiñ
log afsāna samajh kar mujhe sunte hī rahe
dar-haqīqat huuñ haqīqat se banā.ī huī maiñ
merī āñkhoñ meñ samāyā huā koī chehra
aur us chehre kī āñkhoñ meñ samā.ī huī maiñ
kitnī hairān hai duniyā ki muqaddar kī nahīñ
apnī tadbīr ke hāthoñ huuñ banā.ī huī maiñ
mere andāz pe tā-der 'alīnā' vo hañsā
zikr meñ us ke thī yuuñ ḳhud ko bhulā.ī huī maiñ