hue haiñ raam pītam ke nayan āhista-āhista
ki jyuuñ phāñde meñ aate haiñ hiran āhista-āhista
mirā dil misl parvāne ke thā mushtāq jalne kā
lagī us sham.a suuñ āḳhir lagan āhista-āhista
girebāñ sabr kā mat chaak kar ai ḳhātir-e-miskīñ
sunegā baat vo shīrīñ-bachan āhista-āhista
gul o bulbul kā gulshan meñ ḳhalal hove to barjā hai
chaman meñ jab chale vo gul-badan āhista-āhista
'valī' siine meñ mere panja-e-ishq-e-sitamgar ne
kiyā hai chaak dil kā pairahan āhista-āhista