iltijā hai ijz-o-usrat kun-fakānī aur hai

guftugū-e-be-samar mojiz-bayānī aur hai

qarya-e-momin pe hamla kar to pahle soch le

ye ilāqa muḳhtalif ye rājdhānī aur hai

har adālat likh chukī hai faisla to kyā huā

faisla baaqī abhī ik āsmānī aur hai

kuchh na kah kar bhī sadāqat baap kī manvā ga.e

asġhar-e-be-shīr terī be-zabānī aur hai

ek misra.a kah ke 'ābid' ḳhud ko na shā.er samajh

shusta ġhazleñ haiñ kujā aur lan-tarānī aur hai