āshiq-e-haq haiñ hamīñ shikva-e-taqdīr nahīñ

pech-e-qismat kā kam-az-zulf-e-girah-gīr nahīñ

bas ki aahoñ se asīroñ ke bahe laḳht-e-jigar

be-nagīñ aaj koī ḳhāna-e-zanjīr nahīñ

kushtanī paas to aa jaa.e magar tere paas

neza-o-tīr hī hai dashna-o-shamshīr nahīñ

sab ke is umr meñ ho jaate haiñ aise hī havās

tujh se kuchh shikva hameñ ai falak-e-pīr nahīñ

ghar kī vīrānī ko kyā ro.uuñ ki ye pahle se

tañg itnā hai ki gunjā.ish-e-ta.amīr nahīñ

ādamiyat nahīñ tujh meñ ye adū kī hai ġharaz

yuuñ parī kahne meñ maanā tirī tahqīr nahīñ

jumbish abrū ko hai lekin nahīñ āshiq pe nigāh

tum kamāñ kyuuñ liye phirte ho agar tiir nahīñ

himmat-e-murġh-e-sahar-ḳhvāñ kā huuñ qaa.il ki use

naale se zamzama maqsūd hai tāsīr nahīñ

apne ustād ke andāz pe merā hai kalām

mujh ko 'nāzim' havas-e-pairvī-e-'mīr' nahīñ