niiñd āñkhoñ meñ jo aatī to jagāne lagte
ḳhvāb bachchoñ kī tarah shor machāne lagte
raat ko ghar nahīñ aatā to mire ghar vaale
sub.h ke vaqt mirī ḳhair manāne lagte
tere aa jaane se phir aa ga.ī zaḳhmoñ pe bahār
tū nahīñ aatā to sab zaḳhm purāne lagte
vo hameñ DhūñDh ke ik raat meñ ghar le aayā
ham use DhūñDne jaate to zamāne lagte
qais jañgal ko agar chhoḌ ke aa jaatā 'ra.īs'
to mire shahr ke laḌke bhī satāne lagte