vo ranjisheñ vo marāsim kā silsila hī nahīñ

yahāñ kisī meñ vo pahlā sā rābta hī nahīñ

maiñ ḳhushbuoñ ke ta.āqub meñ aa gayā huuñ vahāñ

jahāñ se lauT ke jaane kā rāstā hī nahīñ

ye ḳhud-sarī yā sharārat usī kā hissa hai

vo koī khel mohabbat meñ hārtā hī nahīñ

ye e'tirāf bhī ghabrā ke kar liyā maiñ ne

maiñ chāhtā huuñ tujhe sirf sochtā hī nahīñ

uḌā ke le gayā rātoñ kī niiñd āñkhoñ se

vo kam-suḳhan jo kabhī mujh se boltā hī nahīñ

pukārtā huuñ maiñ us ko usī kī chaukhaT se

kivāḌ jism ke jo mujh pe kholtā hī nahīñ

tabāh ho ga.e ḳhuddāriyoñ meñ donoñ 'ra.īs'

vo ḳhud ko sauñp de lekin maiñ māñgtā hī nahīñ