begāna ho ke bazm-e-jahāñ dekhtā huuñ maiñ
duniyā ke rañg-o-bū kā samāñ dekhtā huuñ meñ
raushan-zamīr jaise koī sarf-e-dīd ho.e
yuuñ jalva-hā-e-kaun-o-makāñ dekhtā huuñ meñ
arzāñ hai zulm-o-jaur kī uftādgī magar
jins-o-vafā-o-mehr-e-garāñ dekhtā huuñ maiñ
ik samt jashn-e-shādī-o-hañgāma-e-nishāt
ik samt hashr āh-o-fuġhāñ dekhtā huuñ maiñ
sharh-e-alam darāz hai al-qissa ai 'shakīl'
ik daaġh apne dil meñ nihāñ dekhtā huuñ maiñ