naġhma-e-ishq sunātā huuñ maiñ is shaan ke saath
raqs kartā hai zamāna mire vijdān ke saath
hai mirā zauq-e-junūñ kufr-o-ḳhirad kī zad meñ
ai ḳhudā ab to uThā le mujhe īmān ke saath
dil banā dost to kyā kyā na sitam us ne kiye
ham bhī nādāñ the nibhāte rahe nādān ke saath
daaġh māthe pe chale shaiḳh-o-barahman le kar
aa.e the dair-o-haram tak baḌe armān ke saath
ġham-e-jānāñ ġham-e-hastī ġham-e-hālāt 'shakīl'
kyā kahūñ kitnī balā.eñ haiñ mirī jaan ke saath