niyāz-o-nāz kī ye shān-e-zebā.ī nahīñ jaatī
hamārī ḳhud-sarī un kī ḳhud-ārā.ī nahīñ jaatī
hazāroñ ā.īne ho kar muqābil TuuT jaate haiñ
magar husn-e-azal kī shān-e-yaktā.ī nahīñ jaatī
koī dilkash nazāra ho koī dilchasp manzar ho
tabī.at ḳhud bahal jaatī hai bahlā.ī nahīñ jaatī
mohabbat kī haqīqat kam nahīñ asrār-e-hastī se
samajh letā huuñ lekin mujh se samjhā.ī nahīñ jaatī
ba-zāhir zabt-e-paiham bhī sharīk-e-dard-e-ulfat hai
'shakīl' is par bhī apne dil kī rusvā.ī nahīñ jaatī