jaam gardish meñ hai dar-band haiñ mai-ḳhānoñ ke

kuchh farishte haiñ yahāñ ruup meñ insānoñ ke

sham.a kī aag meñ dil jalte haiñ parvānoñ ke

hausle dekhiye in soḳhta-sāmānoñ ke

sirf tash.hīr hai shāyad mirā afsāna-e-ġham

aaj ahbāb meñ andāz haiñ begānoñ ke

lazzat-e-ḳhvāb se begāna haiñ māh-o-anjum

sunñe vaale haiñ ye shāyad mire afsānoñ ke

fasl-e-gul rañg-e-chaman daur-e-ḳhizāñ husn-e-bahār

muḳhtalif naam haiñ saaqī tire paimānoñ ke

ai mire nāseh-e-ḳhush-fahm zarā ġhaur se sun

dost nādān huā karte haiñ nā-dānoñ ke

chun liyā hai jinheñ gardūñ ne samajh kar taare

haiñ 'shakīl' aah ye TukḌe mire armānoñ ke