ai mohabbat tire anjām pe ronā aayā

jaane kyuuñ aaj tire naam pe ronā aayā

yuuñ to har shaam umīdoñ meñ guzar jaatī hai

aaj kuchh baat hai jo shaam pe ronā aayā

kabhī taqdīr kā mātam kabhī duniyā kā gila

manzil-e-ishq meñ har gaam pe ronā aayā

mujh pe hī ḳhatm huā silsila-e-nauhagarī

is qadar gardish-e-ayyām pe ronā aayā

jab huā zikr zamāne meñ mohabbat kā 'shakīl'

mujh ko apne dil-e-nākām pe ronā aayā