pahlū meñ dard-e-ishq kī duniyā liye hue
baiThā huuñ zindagī kā sahārā liye hue
dil hai tajallī-e-ruḳh-e-zebā liye hue
āġhosh meñ hai chāñd ko dariyā liye hue
pahuñche to dil meñ josh-e-tamannā liye hue
lauTe magar luTī huī duniyā liye hue
maiñ jī rahā huuñ ġham-kada-e-rozgār meñ
terī mohabbatoñ kā sahārā liye hue
uThtā huuñ bazm-e-husn se laġhzish-ba-pā 'shakīl'
bahkī sī ik nazar kā sahārā liye hue