chāñdnī meñ ruḳh-e-zebā nahīñ dekhā jaatā

maah o ḳhurshīd ko yakjā nahīñ dekhā jaatā

yuuñ to un āñkhoñ se kyā kyā nahīñ dekhā jaatā

haañ magar apnā hī jalva nahīñ dekhā jaatā

dīda-o-dil kī tabāhī mujhe manzūr magar

un kā utrā huā chehra nahīñ dekhā jaatā

zabt-e-ġham haañ vahī ashkoñ kā talātum ik baar

ab to sūkhā huā dariyā nahīñ dekhā jaatā

zindagī aa tujhe qātil ke havāle kar duuñ

mujh se ab ḳhūn-e-tamannā nahīñ dekhā jaatā

ab to jhūTī bhī tasallī ba-sar-o-chashm qubūl

dil kā rah rah ke taḌapnā nahīñ dekhā jaatā