ishq kī gum-shuda manziloñ meñ ga.ī
zindagī lauT kar daldaloñ meñ ga.ī
yās-o-hasrat bharī be-amāñ zindagī
aas ke reshmī āñchaloñ meñ ga.ī
vo sadā jo fuġhāñ ban ke uTThī magar
ḳhāmushī ke ghane jañgaloñ meñ ga.ī
tum se ho kar judā yak-nafas dosto
zindagī marghaToñ daldaloñ meñ ga.ī
kaun jaane ki uḌtī huī dhuup bhī
kis taraf kaun sī manziloñ meñ ga.ī
sub.h-dam rañg nikhrā har ik shāḳh kā
raushnī shabnamī koñpaloñ meñ ga.ī