is ek Dar se ḳhvāb dekhtā nahīñ
jo dekhtā huuñ maiñ vo bhūltā nahīñ
kisī muñDer par koī diyā jilā
phir is ke ba.ad kyā huā patā nahīñ
maiñ aa rahā thā rāste maiñ phuul the
maiñ jā rahā huuñ koī roktā nahīñ
tirī taraf chale to umr kaT ga.ī
ye aur baat rāsta kaTā nahīñ
is azhdahe kī aañkh pūchhtī rahī
kisī ko ḳhauf aa rahā hai yā nahīñ
maiñ in dinoñ huuñ ḳhud se itnā be-ḳhabar
maiñ bujh chukā huuñ aur mujhe patā nahīñ
ye ishq bhī ajab ki ek shaḳhs se
mujhe lagā ki ho gayā huā nahīñ