parā.ī aag pe roTī nahīñ banā.ūñgā
maiñ bhiig jā.ūñgā chhatrī nahīñ banā.ūñgā
agar ḳhudā ne banāne kā iḳhtiyār diyā
alam banā.ūñgā barchhī nahīñ banā.ūñgā
fareb de ke tirā jism jiit luuñ lekin
maiñ peḌ kaaT ke kashtī nahīñ banā.ūñgā
galī se koī bhī guzre to chauñk uThtā huuñ
na.e makān meñ khiḌkī nahīñ banā.ūñgā
maiñ dushmanoñ se agar jañg jiit bhī jā.ūñ
to un kī aurteñ qaidī nahīñ banā.ūñgā
tumheñ patā to chale be-zabān chiiz kā dukh
maiñ ab charāġh kī lau hī nahīñ banā.ūñgā
maiñ ek film banā.ūñgā apne 'sarvat' par
aur is meñ rail kī paTrī nahīñ banā.ūñgā