justujū jab tirī nahīñ hogī

merī manzil koī nahīñ hogī

maiñ huuñ chhoTā to kyā ye lāzim hai

merī ḳhvāhish baḌī nahīñ hogī

yuuñ to jugnū bhī haiñ hasīñ lekin

in se to raushnī nahīñ hogī

koī chehra khilā nahīñ lagtā

dil meñ shāyad ḳhushī nahīñ hogī

ab ke bastī meñ hai jo sannāTā

ḳhatm ye ḳhāmushī nahīñ hogī

ab chaleñ dasht ko vahāñ shāyad

itnī be-raunaqī nahīñ hogī

ḳhvāb 'mas.ūd' kyā vo dekhegā

aañkh jis kī lagī nahīñ hogī