jo ḳhat hai shikasta hai jo aks hai TuuTā hai
yā husn tirā jhūTā yā aa.ina jhūTā hai
ham shukr kareñ kis kā shākī hoñ to kis ke huuñ
rahzan ne bhī luuTā hai rahbar ne bhī luuTā hai
yaad aayā in āñkhoñ kā paimān-e-vafā jab bhī
sāġhar mire hāthoñ se be-sāḳhta chhūTā hai
har chehre pe likkhā hai ik qissa-e-mazlūmī
bedard zamāne ne har shaḳhs ko luuTā hai
manzil kī tamannā meñ sar-garm-e-safar haiñ sab
kaun us ke liye ro.e jo raah meñ chhūTā hai
allāh re 'hafīz' us kā ye zauq-e-ḳhud-ārā.ī
jab zulf sañvārī hai ik aa.ina TuuTā hai