lahū kī mai banā.ī dil kā paimāna banā Daalā

jigar-dāroñ ne maqtal ko bhī mai-ḳhāna banā Daalā

hamāre jazba-e-tāmīr kī kuchh daad do yaaro

ki ham ne bijliyoñ ko sham.a kā shāna banā Daalā

sitam Dhāte ho lekin lutf kā ehsās hotā hai

isī andāz ne duniyā ko dīvāna banā Daalā

bharī mahfil meñ ham ne baat kar lī thī un āñkhoñ se

bas itnī baat kā yāroñ ne afsāna banā Daalā

mire zauq-e-parastish kī karishma-sāziyāñ dekho

kabhī ka.aba kabhī ka.abe ko but-ḳhāna banā Daalā

shikāyat bijliyoñ se hai na shikva bād-e-sarsar se

chaman ko ḳhud chaman vāloñ ne vīrāna banā Daalā

chalo achchhā huā duniyā 'hafīz' ab duur hai ham se

mohabbat ne hameñ duniyā se begāna banā Daalā