galī meñ baḳht ke un kā bhī kuchh qissa nikal aayā

huī thī sulh kis mushkil se phir jhagḌā nikal aayā

maiñ apne shor ke sadqe ki dekhā aaj to us ko

bharā ġhusse meñ ghar se shoḳh be-parvā nikal aayā

nadāmat jo huī deñ gāliyāñ afsāna-goyoñ ko

vo sunte the kahānī zikr kuchh merā nikal aayā

kisī kā ghar nahīñ ye to galī hai soch o zālim

ghar uktā kis liye hai bhuul kar is jā nikal aayā

mirī taqdīr badlī zo.af se āvāz kyā badlī

vo apne dil meñ dushman kī sadā samjhā nikal aayā

jo sach pūchho to sadqe meñ tumhāre aks aariz ke

kañval phūle diloñ ke rañg ġhunchoñ kā nikal aayā

'nasīm' un ko jo apnā jazb-e-ḳhātir is taraf laayā

gale mil mil ke ro.e hausla dil kā nikal aayā