āñkhoñ se mirī is liye laalī nahīñ jaatī
yādoñ se koī raat jo ḳhālī nahīñ jaatī
ab umr na mausam na vo raste ki vo palTe
is dil kī magar ḳhām-ḳhayālī nahīñ jaatī
māñge to agar jaan bhī hañs ke tujhe de deñ
terī to koī baat bhī Taalī nahīñ jaatī
aa.e koī aa kar ye tire dard sambhāle
ham se to ye jāgīr sambhālī nahīñ jaatī
ma.alūm hameñ bhī haiñ bahut se tire qisse
par baat tirī ham se uchhālī nahīñ jaatī
hamrāh tire phuul khilātī thī jo dil meñ
ab shaam vahī dard se ḳhālī nahīñ jaatī
ham jaan se jā.eñge tabhī baat banegī
tum se to koī raah nikālī nahīñ jaatī