aaj hameñ ye baat samajh meñ aa.ī hai
tum mausam ho aur mausam harjā.ī hai
tū ne kaise moḌ pe chhoḌ diyā mujh ko
dil kī baat chhupā.ūñ to rusvā.ī hai
tere baad bachā hai kyā jīvan meñ mire
maiñ huuñ bhīgī shaam hai aur tanhā.ī hai
aaj mirī āñkhoñ meñ sāvan utregā
aaj bahut din baad tirī yaad aa.ī hai
aaj kī raat bahut bhārī hai donoñ par
aaj mujhe vo ḳhat lauTāne aa.ī hai
jaane maiñ kyā soch ke chup huuñ gum-sum huuñ
jaane kyā vo soch ke vāpas aa.ī hai
ye mehmān-navāzī hai yā aur hai kuchh
mere liye vo chaa.e banā ke laa.ī hai
aaj hameñ ye baat samajh meñ aa.ī hai
tum mausam ho aur mausam harjā.ī hai