jo shaḳhs saare zamāne kā rañj sahtā thā
vo aaj raah meñ misl-e-ġhubār baiThā thā
yuuñ but banā vo khaḌā thā ki kyā batā.ūñ tumheñ
maiñ us ko chhūne se pahle ḳhayāl samjhā thā
maiñ so rahā thā ki vo ḳhvāb mujh pe TuuT paḌā
maiñ kaise bach ke nikaltā ki maiñ to andhā thā
hazār naam the jo lauh-e-dil pe likkhe the
magar vo naam ki jaise charāġh jaltā thā
baras rahā thā qayāmat kā abr sar pe mire
magar ye baat ajab thī maiñ phir bhī pyāsā thā
na us ne mujh se kahā thā ki Thahro ruk jaao
na sañg-e-surḳh ko maiñ ne palaT ke dekhā thā
balā-e-shahr mujhe DhūñDhtī thī galiyoñ meñ
maiñ apne-āp ko ghar meñ chhupā.e baiThā thā
havā-e-sarv ne patthar chalā.e the kyā kyā
harā-bharā vo shajar ek pal meñ nañgā thā
sabhī se miltā hai lekin vo ab kisī kā nahīñ
'azīm' tum ne bhī dekhā ki vo tumhārā thā