mirī sadā ko havā.eñ bhī qaid kartī haiñ
mirī nigah ko fazā.eñ bhī qaid kartī haiñ
jabhī to khul ke barastī haiñ abr kī sūrat
ki mere ashk ghaTā.eñ bhī qaid kartī haiñ
bas ek had hai ki aage nikal nahīñ paate
qadam qadam pe vafā.eñ bhī qaid kartī haiñ
ye ik hisār banātī haiñ chaar sū mere
mujhe to terī duā.eñ bhī qaid kartī haiñ
maiñ terī yaad kī chādar ko oḌh letī huuñ
diloñ ke dard ridā.eñ bhī qaid kartī haiñ